Президент коронавирустың таралуына байланысты халыққа үндеу жасады

Мемлекет басшысы Қасым-Жомарт Тоқаев коронавирусқа байланысты қазақстандықтарға үндеу жасады, деп хабарлайды 7152.kz тілшісі Ақорда баспасөз қызметінің Twitter парақшасына сілтеме жасап.

-Коронавирустың жаңа толқыны ең жойқын болып отыр. Соңғы күндері жүздеген азаматымыздан айырылып қалдық. Әр өңірде ауруханаға түскен науқастардың саны күрт көбейді. Жансақтау бөлімдерінің барлығы іске қосылды. Қосымша дәрі-дәрмек пен құрал-жабдық сатып алынды, - дейді президент.

Осы ретте Қасым-Жомарт Тоқаев ел тұрғындарына үндеу жасап, денсаулықты сақтауға шақырды. -Еліміздің әр азаматына айтарым: денсаулықты сақтаңыздар, туған-туыстың, отбасының амандығын ойлаңыздар! Ал, Үкімет пен өңір басшылары белгіленген міндеттердің бәрін мінсіз атқаруға тиіс, - дейді мемлекет басшысы.

Осыған дейін президент елде коронавирус жұқтырғандар санының күрт өскенін айтқан болатын. Мемлекет басшысының сөзінше, қазір алда тұрған мақсат - адам өмірін сақтап қалу. Ал оның бір ғана жолы – жаппай вакцинация.