Тағы да малдың қатысуымен жол-көлік оқиғасы тіркелді

Солтүстік Қазақстан облысында тағы да  бір жеңіл көлік жүргізушісі жолға шыққан малды соғып, салдарынан бірнеше қой өлді, деп хабарлайды 7152.kz  тілшісі.

Жол-көлік оқиғасы 12 қазан күні сағат 09.15-те орын алды. Шал ақын ауданының 68 жастағы тұрғыны Mitsubishi көлігімен «Жезқазған-Петропавл» тасжолының Есіл ауданы Қаратал ауылының маңында қойларды соқты. Салдарынан 16 бас малға зақым келді. Жол-көлік оқиғасы мал өтетіндігі туралы ескерту белгісінің аумағында болған. Оқиға орнынан түсірілген видео әлеуметтік желіде тарады.  Бұл дерекке қатысты СҚО полиция департаменті түсінік берді.

- Жүргізуші аман, көлік механикалық зақымданды. Қазіргі уақытта СҚО ПД патрульдік полиция батальонының қызметкерлері материал жинап, жол учаскесінің осы бөлігінде қауіпсіздікті қамтамасыз етуде - деп түсініктеме берді СҚО ПД.

Бұл бір айдың ішінде орын алған осындай үшінші оқиға. 

Тағы да оқыңыздар: Серіктестік аумағынан зығыр ұрлаған екі күдікті ұсталды