Облыста кейбір ауылдар карантинге жабылуы мүмкін

СҚО өңірлік коммуникациялар қызметінде аймақта коронавирус таралуы бойынша ағымдағы жағдай туралы брифинг өтті. Онда облыс әкімінің орынбасары Асқар Сақыпкереев, тұрғындар көп ауырған ауылдар карантинге жабылуы мүмкін дегенді айтты, деп хабарлайды7152.kzсайтының тілшісі.

- Еліміздің бірнеше өңірі карантин шектеуін күшейтіп, демалыс күндеріне локдаун енгізіп жатыр. Біз де сол қадамға баруға мәжбүр боламыз. Халық жағдайдың ушығып бара жатқанын әлі де түсінер емес. Облыстағы мейрамханалар мен дәмханаларға телефонмен хабарластық, сенбі-жексенбіге біреуі де бос емес. Бас мемлекеттік санитар дәрігердің қаулысына сәйкес елімізде жаназадан басқа іс-шараларды өткізуге тыйым салынған, - дейді СҚО әкімінің орынбасары Асқар Сақыпкереев.

СҚО-да мониторинг топтары өткен демалыстан бастап жаңа алгоритммен жұмысқа кірісті. Талапты бұзғандарға жаза күшейтіледі.Рұқсатсыз той-томалақ өткізіп жатқандардың ісі сотқа беріліп, талапты бұзған нысандардың жұмысы тоқтатылады. Қазір өңірде кей елді мекендерді карантинге жабу мәселесі қарастырылып жатыр.

-Қазір елді мекендер бойынша ауырғандар санын анықтап жатырмыз. Бұған дейін қолданылған тәжірибені қайта енгізетін боламыз. Яғни, тұрғындар көп ауырған ауылдарда жүріп-тұру шектеледі. Бұл өз нәтижесін береді, - деді СҚО әкімінің орынбасары.

Тағы да оқыңыздар:СҚО-да бір апта ішінде коронавирус жұқтырғандар саны 1,3 есеге өсті