Қызылжар ауданында 500 тауық, 50 торай тірідей жанып кетті

Қызылжар ауданында тамыздың 22-і күні 5 өрт болды. Ең ірі оқиға Знаменское ауылында болған. Онда 2 қора, 3 гараж, 2 монша, автокөлік және 500 тауық пен 50 торай тірідей өртеніп кетті, деп хабарлайды 7152.kz тілшісі.

Облыста тіркелген өрт оқиғалары жайында ТЖД мамандары брифингте айтты. Знаменское ауылында болған оқиғада абырой болғанда 2 пәтерлі тұрғын үйге зақым келмеген. Ал Соколовка елді мекенінде моншадан шыққан қызыл жалын баспанаға зақым келтірді. 

-Соколовка елді мекенінде тұрғын үйдегі моншада өрт шығып, жалын 2-пәтерлі үйдің шатырына ауысқан. Тілсіз жаудың кесірінен шатыр толығымен жанып кетті. Сондай-ақ, дәліздің қабырғасы да зақымданған. Қазіргі таңда шығын мөлшері анықталып жатыр. Жалпы жыл басынан ауданда өрттен 5 адам қаза тапты,- деді брифингте Қызылжар аудандық ТЖ бөлімінің бастығы Аслан Ахметжанов.

Жыл басынан бері облыста 458 өрт оқиғасы тіркелді. Оның 70%-і жеке сектордың үлесінде. Салдарынан 36 адам қаза тауып, 35 азамат түрлі деңгейдегі жарақат алған. Материалдық шығын мөлшері 174 миллион теңгеге жеткен.

Тағы да оқыңыздар:Петропавлдық апалы-сіңлілер ШҚО-да есірткі саудасымен айналысқан