16 жасқа дейінгі балаларға әлеуметтік желіге шектеу, Динара Сәтжанның келін түсіруі және Қарағандыдағы рекордтық концерт: Kaznet не талқылады?

Осы аптада Kaznet қолданушыларының талқылаған жаңалықтарын 7152.kz шолушысы ұсынады.

Baribar.kz Президент Қасым-Жомарт Тоқаевтың 16 жасқа толмаған балалардың әлеуметтік желіге тіркелуіне заң арқылы тыйым салу бастамасын қолдайтынын жазды. Мемлекет басшысы Құрылтайдың бірінші сессиясында өскелең ұрпақ үшін қауіпсіз орта қалыптастыру маңызды екенін атап өтті. Оның айтуынша, Үкімет 16 жасқа толмаған балалардың әлеуметтік желілерге тіркелуіне тыйым салуды ұсынып отыр. Президент бұл бастаманың әлемнің көптеген елінде қолға алынып жатқанын айтып, оны қолдайтынын жеткізді. Сонымен қатар Қасым-Жомарт Тоқаев заң қабылданған жағдайда оның іс жүзінде орындалуын қамтамасыз ету қажеттігін атап өтті. «Қауқарсыз заң ешкімге қажет емес», деген Президент жаңа талаптардың нақты жұмыс істеуі маңызды екенін айтты. Бұл тақырып әлеуметтік желі қолданушылары арасында балалардың интернеттегі қауіпсіздігі, ата-ананың жауапкершілігі және жасөспірімдердің әлеуметтік желілерді пайдалануына қатысты қызу пікірталас туғызды.

Baribar.kz тележүргізуші әрі блогер Динара Сәтжанның ұлы Даниалдың Айнұр есімді бойжеткенмен шаңырақ көтергенін хабарлады. Тележүргізуші әлеуметтік желідегі парақшасында бүгін келінін үйге алып қайтатынын айтып, жаңа мәртебесі туралы жазды. Динара Сәтжан келін түсіруді өзі үшін үлкен жауапкершілік деп қабылдайтынын жеткізді. Оның айтуынша, жаңа отбасылық кезеңде жастардың жеке шекарасын құрметтеу, оларды түсіну және жақсы қарым-қатынас орнату маңызды. Тележүргізуші бұл жағдайдың өзіне де жаңа рөл жүктейтінін айтып, заманауи ене ретінде өзін тәрбиелеу керектігін атап өтті. Динара Сәтжанның жазбасы әлеуметтік желіде көпшіліктің назарын аударып, оқырмандар оның жаңа мәртебесіне қатысты пікірлерін білдірді.

Stan.kz Қарағандыда Шахтер күніне арналған ауқымды концертке шамамен 250 мың көрермен жиналғанын жазды. 29 тамызда өткен мерекелік шарада бір сахнада Dequine, Moldanazar, Қайрат Нұртас, Дима Билан және Димаш Құдайберген өнер көрсетті. Басылымның мәліметінше, концерт Қазақстанның тәуелсіздік тарихындағы Шахтер күніне арналған ең ауқымды шаралардың біріне айналды. Қарағандыға мерекені тамашалау үшін өңір тұрғындарымен қатар Қазақстанның басқа облыстарынан және шетелден де қонақтар келген. Кеш барысында әртүрлі буын мен жанрдағы танымал орындаушылар өнер көрсетіп, көрермендерге бірнеше сағатқа созылған үлкен шоу ұсынылды. Дима Билан Қарағанды тұрғындары мен көрермендерге жылы қабылдауы үшін алғыс айтып, шахтерлерді мерекемен құттықтады. Ал кештің көпшілік асыға күткен сәттерінің бірі Димаш Құдайбергеннің сахнаға шығуы болды. Мерекелік бағдарлама соңында үлкен отшашу ұйымдастырылып, миллионға жуық көрермен қатысқан кеш аяқталды.